വീണ്ടും ഓളം തീർക്കാൻ മഹാലക്ഷ്മിയും കുമരനും. റീ റിലീസ് മാർച്ച് 14 ന്

രണ്ടു പതിറ്റാണ്ടുകൾക്ക് മുമ്പ് ട്രെൻഡ് സെറ്ററായി പ്രേക്ഷകരെ ഒന്നടങ്കം വശീകരിച്ച മെഗാ ഹിറ്റ് സിനിമയാണ് രവി മോഹനെ നായകനാക്കി മോഹൻ രാജ ( ജയം രാജ ) സംവിധാനം ചെയ്‌ത " എം .കുമരൻ സൺ ഓഫ് മഹാലക്ഷ്‌മി ". ചിത്രത്തിലെ പല അഭിനേതാക്കൾക്കും വഴിത്തിരിവായ ഒരു സിനിമ കൂടിയായിരുന്നു ഇത് . അസിൻ തമിഴിൽ നായികയായി അരങ്ങേറ്റം കുറിച്ച ചിത്രം .നാദിയാ മൊയ്‌തുവിന്റെ മഹാലക്ഷ്മി എന്ന അമ്മ വേഷം , ഒരിടവേളക്ക് ശേഷമുള്ള താരത്തിൻെറ ശക്തമായ തിരിച്ചു വരവ് കൂടി ആയിരുന്നു. ഫിലിം എഡിറ്റർ മോഹൻ നിർമ്മിച്ച, "എം .കുമരൻ സൺ ഓഫ് മഹാലക്ഷ്‌മി " മാർച്ച് 14 - ന് പുനപ്രദർശനത്തിന് തയ്യാറെടുക്കുക്കയാണ് .

ബോക്സിങ്ങിൻ്റെ പശ്ചാത്തലത്തിൽ ആക്‌ഷൻ , പ്രണയം , നർമ്മം , ദുരൂഹത ,വൈകാരികത എന്നിവ ചേരുംപടി ചേർത്ത് ആബാലവൃദ്ധം കാണികളേയും ആകർഷിക്കും വിധം മോഹൻ രാജ അണിയിച്ചൊരുക്കിയ " എം .കുമരൻ സൺ ഓഫ് മഹാലക്ഷ്‌മി " ക്ക് അന്ന് ലോകമെമ്പാടും വൻ സ്വീകരണമാണ് ലഭിച്ചത് . ഒരു തമിഴ് യുവാവും മലയാളി പെൺകുട്ടിയും തമ്മിലുള്ള പ്രണയത്തിന്റെ അകമ്പടിയോടെയായിരുന്നു ചിത്രത്തിന്റെ കഥാപ്രയാണം . ശ്രീകാന്ത് ദേവ സംഗീതം നൽകി ചിട്ടപ്പെടുത്തിയ ഇതിലെ ഗാനങ്ങൾ എല്ലാം തന്നെ സൂപ്പർ ഹിറ്റുകളായിരുന്നു എന്നതും , ഇന്നും അവ ശ്രോതാക്കളുടെ പ്രിയപ്പെട്ട ആൽബമാണെന്നതും ശ്രദ്ധേയമാണ് . രണ്ടു പതിറ്റാണ്ടുകൾക്ക് ശേഷം വീണ്ടും പ്രദർശനത്തിന് എത്തുമ്പോൾ പ്രേക്ഷകർ ചിത്രത്തിനെ അതേ ആവേശത്തോടെ സ്വീകരിക്കാൻ കാത്തിരിക്കയാണ് . റീ റീലീസ് തിയ്യതി പ്രഖ്യാപിച്ചപ്പോൾ തന്നെ സമൂഹ മാധ്യമങ്ങളിലൂടെ വമ്പൻ സ്വീകരണമാണ് ചിത്രത്തിന് ലഭിക്കുന്നത് . ആലപ്പുഴ, പൊള്ളാച്ചി ചെന്നൈ , ഹൈദരാബാദ് , മലേഷ്യാ എന്നിവിടങ്ങളിലായി ചിത്രീകരിച്ച ഈ ചിത്രത്തിലെ മറ്റ് പ്രധാന അഭിനേതാക്കൾ പ്രകാശ് രാജ് ,ഐശ്വര്യ , വിവേക് ,'വെണ്ണിറ ആടൈ ' മൂർത്തി ,ടി .പി .മാധവൻ ,ജ്യോതി ലക്ഷ്‌മി എന്നിവരാണ് . മാർച്ച് 14 -ന് വീണ്ടും പ്രദര്ശനത്തിനെത്തുന്ന " എം .കുമരൻ സൺ ഓഫ് മഹാലക്ഷ്‌മി " ഡ്രീം ബിഗ് ഫിലിംസ് കേരളത്തിൽ റിലീസ് ചെയ്യും. - സി. കെ. അജയ് കുമാർ, പി ആർ ഒ.

https://youtu.be/I-MCxn4dyWI