മിണ്ടിയാലും കുഴപ്പം മിണ്ടിയില്ലെങ്കിലും കുഴപ്പം ; അവരവർക്ക് അർഹതപ്പെട്ടത്‌ അവരവർക്ക് തീർച്ചയായും കിട്ടും: പ്രതികരിച്ച് നടൻ ബാല
തങ്ങൾക്കൊരു കുട്ടി ഉടനെ വരുമെന്നും തുടര്‍ച്ചയായി ബുദ്ധിമുട്ടിക്കരുതെന്നും വിഡിയോയോയിൽ ബാല പറയുന്നു
തനിക്കെതിരെ വഞ്ചനാകുറ്റത്തിനും വ്യാജ രേഖ ചമച്ചതിനും മുന്‍ഭാര്യയുടെ പരാതിയില്‍ പ്രതികരിച്ച് നടൻ ബാലയും ഭാര്യ കോകിലയും. തന്നെ തുടര്‍ച്ചയായി ബുദ്ധിമുട്ടിക്കരുതെന്ന് നടന്‍ ബാല പ്രതികരിച്ചു. വ്യാജരേഖ നിര്‍മാണം എന്ന വാക്ക് തനിക്ക് അര്‍ഹതപ്പെട്ടതല്ലെന്ന് ഫെയ്‌സ്ബുക്കില്‍ പങ്കുവെച്ച വീഡിയോയില്‍ പറയുന്നു. ഭാര്യ കോകിലയ്ക്കൊപ്പം ആണ് ബാല ഫേസ്ബുക്കിൽ വീഡിയോ പങ്കുവെച്ചത്. മുൻഭാര്യയുമായുള്ള വിഷയത്തിൽ ഇനി പേരെടുത്ത് സംസാരിക്കില്ല എന്ന് കോടതിക്കും പോലീസിനും താൻ വാക്കുകൊടുത്തിട്ടുണ്ടെന്നും ആ വാക്ക് താൻ തെറ്റിച്ചിട്ടില്ല എന്നും ബാല പറഞ്ഞു.
ഭാര്യയോടൊപ്പം സന്തോഷമായി ജീവിക്കുന്ന തനിക്ക് ഇപ്പോൾ ഒരു കുട്ടി പിറക്കാൻ പോവുകയാണെന്ന് ബാല പറയുന്നു.
"എന്റെ വളരെ ഒരു ബുദ്ധിമുട്ടുള്ള അവസ്ഥ നിങ്ങളോട് പറയാനാണ് ഞാൻ വന്നത്. ഞാന്‍ ഇതിനെ കുറിച്ച് ഇനി ഒരിക്കലും പേരെടുത്ത് സംസാരിക്കില്ല എന്ന് കോടതിയിലും പൊലീസിനും ഞാന്‍ വാക്ക് കൊടുത്തതാണ്. അന്നുതൊട്ട് ഇന്നുവരെ എന്റെ വാക്ക് ഞാന്‍ പാലിച്ചിട്ടുണ്ട്. പിന്നെ കേസിന് മേലെ കേസ് കൊടുത്ത് എന്റെ വായടച്ചിട്ട് മിണ്ടാതെ ഇരിക്കണം എന്ന് പറഞ്ഞാല്‍ എന്ത് ചെയ്യാനാണ്.
ഞങ്ങള്‍ ഇപ്പോള്‍ സന്തോഷമായി പോകുന്നു, സമാധാനമായി ജീവിക്കണം എന്ന് ആഗ്രഹിക്കുന്നു. പക്ഷെ മറ്റേ സൈഡില്‍ നിന്ന് ഇങ്ങനെ തുടരെ തുടരെ പ്രശ്‌നങ്ങള്‍ വന്നുകൊണ്ടിരിക്കുന്നു. എന്റെ അവസ്ഥ എന്താണെന്ന് വച്ചാല്‍ സംസാരിച്ചാല്‍ എന്റെ മേലില്‍ അടുത്ത കേസ് വരും സംസാരിച്ചില്ലെങ്കില്‍ യുട്യൂബ് കാരും ചാനലുകളും ഉള്‍പ്പടെ എനിക്കെതിരെ ഓരോ ആരോപണങ്ങള്‍ പറയും.ഞാന്‍ വ്യാജ രേഖ ഉണ്ടാക്കി എന്നൊക്കെ ചാനലില്‍ പറയുന്നത് കേട്ടു. ഇനി ഞാന്‍ എന്താണ് ചെയ്യേണ്ടത്, ഞാന്‍ മിണ്ടണോ മിണ്ടാതെ ഇരിക്കണോ? മിണ്ടിയാലും കുഴപ്പം മിണ്ടിയില്ലെങ്കിലും കുഴപ്പം. ഞാന്‍ എന്ത് ചെയ്യണം? ഞാന്‍ എന്റെ ഭാര്യയോടൊപ്പം ജോളി ആയി ഇരിക്കുകയാണ്. ഞങ്ങള്‍ക്കൊരു കുട്ടി വരാന്‍ പോകുന്നു, ഉടനെ വരും. ഞങ്ങളുടെ കുടുംബം നോക്കി ഞങ്ങള്‍ പോകുന്നതായിരിക്കും നല്ലത്.അവരവർക്ക് അർഹതപ്പെട്ടത്‌ അവരവർക്ക് തീർച്ചയായും കിട്ടും. വ്യാജരേഖ ചമച്ചു എന്നൊക്കെ പറയുന്നത് ബാല കേൾക്കാൻ ഉള്ള വാക്കല്ല. അത് വളരെ തെറ്റായിപ്പോയി. ഒരുപാട് പേർക്ക് നന്മ ചെയ്യുന്ന ആളാണ് ഞാൻ.ആ നന്മയ്ക്ക് എല്ലാം വിഷം വക്കുന്നതുപോലെ ആയിപ്പോകും ഇത്. ഇങ്ങനത്തെ വാക്കുകൾ മാധ്യമങ്ങൾ ഉപയോഗിക്കരുത്. അങ്ങനെ ഒരാളല്ല ബാല." ഫേസ്ബുക്കിൽ പങ്കുവെച്ച വിഡോയിൽ ബാല പറഞ്ഞു.
ബാലയും മുൻ ഭാര്യയും തമ്മിലുള്ള വിവാഹമോചന ഉടമ്പടിയിൽ മുൻ ഭാര്യയുടെ ഒപ്പ് ബാല വ്യാജമായി ഇട്ടുവെന്ന മുൻ ഭാര്യയുടെ പരാതിയിലാണ് ബാലയ്‌ക്കെതിരെ കടവന്ത്ര പൊലീസ് കേസെടുത്തത്.ഉടമ്പടിയിലെ ഒരു പേജ് വ്യാജമായി നിർമിച്ചതാണെന്നും ഉടമ്പടി പ്രകാരമുള്ള ഇൻഷുറൻസ് പ്രീമിയം തുക അടച്ചില്ലെന്നും പരാതിയുണ്ട്.വ്യാജ രേഖകൾ ചമച്ച് ഹൈക്കോടതിയെ തന്നെ ബാല തെറ്റിദ്ധരിപ്പിച്ചുവെന്ന് മുൻ ഭാര്യ അമൃതയുടെ പരാതിയിൽ പറയുന്നു.