മലബാർ പശ്ചാത്തലത്തിലൊരുങ്ങുന്ന 'ഒരു വടക്കൻ സന്ദേശം'
മലബാർ ജീവിതപശ്ചാത്തലത്തിലൂടെ ആ നാടിൻ്റെ ജീവിതത്തിൻ്റെ നേർക്കാഴ്ച്ച പറയുന്ന ചിത്രമാണ് ഒരു വടക്കൻ സന്ദേശം.സാരഥി പ്രൊഡക്ഷൻസിൻ്റെ ബാനറിൽ അജയൻ ചോയങ്കോട് സംവിധാനം ചെയ്യുന്ന ചിത്രത്തിന്റെ രചന നിർവഹിച്ചിരിക്കുന്നത് സത്യചന്ദ്രൻ പൊയിൽക്കാവാണ്. കണ്ണൂരിലും, പരിസരങ്ങളിലുമായി കലാരംഗങ്ങളിൽ സജീവമായി പ്രവർത്തിക്കുന്ന ഒരു സംഘം കലാകാരന്മാരെ കേന്ദ്രീകരിച്ചുകൊണ്ടാണ് ചിത്രം അവതരിപ്പിച്ചിരിക്കുന്നത്. മലബാറിൻ്റെ ജീവിത സംസ്കാരവും, ആചാരാനുഷ്ടാനങ്ങളും, കലാപ്രവർത്തനങ്ങളും രാഷ്ട്രീയ സാമൂഹ്യ കാഴ്ച്ചപ്പാടുകളുമൊക്കെ കേന്ദ്രവിഷയമാക്കി ഒരു നാടിൻ്റേയും, ഏതാനും ചെറുപ്പക്കാരുടേയും ജീവിതമാണ് ചിത്രം അവതരിപ്പിക്കുന്നത്. കൂടാതെ ഹൃദയഹാരിയായ ഒരു പ്രണയവും ചിത്രത്തിൻറെ ഭാഗമാകുന്നുണ്ട്.
കണ്ണാടിപ്പൊയിൽ എന്ന ഗ്രാമത്തിലാണ് ചിത്രത്തിൻ്റെ കഥ നടക്കുന്നത്. ചെറുപ്പത്തിൻ്റേതായ പ്രസരിപ്പിനിടയിലും നാടിൻ്റെ നന്മ ആഗ്രഹിക്കുന്ന ഏതാനും ചെറുപ്പക്കാരിലൂടെയും, നാട്ടിലെ സാമൂഹ്യ പ്രവർത്തകയും, അങ്കണവാടി ടീച്ചറുമായ ജ്യോതി ലഷ്മിയിലൂടേയുമാണ് ചിത്രത്തിൻ്റെ കഥാ പുരോഗതി. കൂട്ടത്തിലെ സുധിയുടെ തന്നെ ടൂ വീലർ വർക്ക്ഷോപ്പിൽ പണിയെടുക്കുന്നവരാണിവരെല്ലാം.ജോയി, അഷറഫ്, കിരൺ എന്നിവരാണ് കൂട്ടത്തിലെ മറ്റുള്ളവർ. ചിത്രത്തിൽ നടക്കുന്ന ഒരു കൊലപാതകവും ചിത്രത്തിന്റെ ഉദ്വേഗം വർധിപ്പിക്കുന്നു.
നർമ്മവും, പ്രണയവും, അൽപ്പം ഹൊററും കോർത്തിണക്കിയാണ് ഈ ചിത്രത്തിൻ്റെ അവതരണം. മലബാർ മേഖലയില മികച്ച മോണോ ആക്ട് കലാകാരനായ റസൽ ഹാരിസ്സാണ് ഈ ചിത്രത്തിലെ കേന്ദ്ര കുപാത്രത്തെ അവതരിപ്പിക്കുന്നത്. സുരഭി , അനിൽ വടക്കുമ്പാട്, രാജൻ കണ്ടത്തിൽ, ലസിതദാമോദരൻ റീന എന്നിവരും പ്രധാന കഥാപാത്രങ്ങളെ അവതരിപ്പിക്കുന്നു. ഇവരെല്ലാം ഈ മേഖലകളിലെ കലാരംഗങ്ങളുമായി ചേർന്നു പ്രവർത്തിക്കുന്നവരാണ്.
ഛായാഗ്രഹണം - കമൽനാഥ് പയ്യന്നൂർ, നിർമ്മാണ നിർവ്വഹണം -ജോബി ആൻ്റെണി, മെയ് ഒന്നിന് ചിത്രീകരണം ആരംഭിക്കുന്ന ഈ ചിത്രത്തിൻ്റെ ചിത്രീകരണംകണ്ണർ, തലശ്ശേരി. തളിപ്പറമ്പ്, ഭാഗങ്ങളിലായി പൂർത്തിയാകും.
(പി ആർ ഒ) വാഴൂർ ജോസ്.
