എഴുതിയത് പൃഥ്വിരാജ്, ആലപിച്ചത് പ്രാർത്ഥന ഇന്ദ്രജിത്ത്; വൈറലായി തീം സോങ്

എൽ 2: എമ്പുരാൻ്റെ ടീസർ സോഷ്യൽ മീഡിയയിൽ കൊടുങ്കാറ്റായി മാറികൊണ്ടിരിക്കുകയാണ്. നിമിഷങ്ങൾക്കകം ദശലക്ഷക്കണക്കിന് ആളുകൾ ആണ് ടീസർ കണ്ടിരിക്കുന്നത്. മുരളി ഗോപിയുടെ രചനയിൽ പൃഥ്വിരാജ് സുകുമാരൻ സംവിധാനം ചെയ്ത ഈ ചിത്രം മലയാളം, തമിഴ്, ഹിന്ദി, തെലുങ്ക്, കന്നഡ ഭാഷകളിൽ മാർച്ച് 27 ന് റിലീസ് ചെയ്യും. ടീസറിൽ ആവേശമുണ്ടാക്കിയ തീം സോങ്ങിൻ്റെ വരികൾ എഴുതിയിരിക്കുന്നത് പൃഥ്വിരാജ് തന്നെയാണ്. ഇന്ദ്രജിത്ത് സുകുമാരൻ്റെ മകൾ പ്രാർത്ഥന ഇന്ദ്രജിത്ത് ആണ് ഈ തീം സോങ് ആലപിച്ചിരിക്കുന്നത്. ദീപക് ദേവ് സംഗീതം നൽകിയ ഗാനത്തിന് വ്യാപകമായ പ്രശംസ ലഭിച്ചിരുന്നു. എമ്പുരാന്റെ ഓരോ വിശേഷങ്ങളും സാമൂഹികമാധ്യമങ്ങളില്‍ ആരാധകര്‍ ആഘോഷമാക്കുന്നതിനിടയിൽ ഗാനം എഴുതിയത് പൃഥ്വിരാജ് തന്നെയാണെന്നുള്ള കാര്യം ഇപ്പോൾ ശ്രദ്ധ ആകർഷിച്ചിരിക്കുകയാണ്.കഴിഞ്ഞദിവസം യൂട്യൂബിലൂടെ ടീസര്‍ മ്യൂസിക് പുറത്തുവന്നതോടെയാണ് ഈ കാര്യം വൈറൽ ആയത്. പ്രാർത്ഥന ഇന്ദ്രജിത്ത് ഇതിനു മുൻപും സിനിമയിൽ ഗാനങ്ങൾ ആലപിച്ചിട്ടുണ്ട്. മമ്മൂട്ടി നായകനായ ദി ഗ്രേറ്റ് ഫാദർ, കുട്ടൻപിള്ളയുടെ ശിവരാത്രി, മോഹൻലാൽ, ഹെലൻ, തുടങ്ങിയ മലയാള സിനിമയിലും ഹേ സിനാമിക, ഓ ബേബി തമിഴ് സിനിമയിലും പ്രാർത്ഥന ഇന്ദ്രജിത്ത് ഗാനം ആലപിച്ചിട്ടുണ്ട്. ഇതിൽ ഹെലൻ എന്ന സിനിമയിലെ 'താരാപഥമാകെ' എന്ന് തുടങ്ങുന്ന ഗാനത്തിന് മികച്ച ഗായികയ്ക്കുള്ള അവാർഡും ലഭിച്ചിരുന്നു. എന്നാൽ പൃഥ്വിരാജ് സുകുമാരൻ ഒരു സിനിമയിൽ ഗാനം രചിക്കുന്നത് ഇത് ആദ്യമായി ആണ്.