മോദിയുടെ പ്രചരണത്തിൽ മോഹൻലാലും ; മമ്മൂട്ടിയെയും രജനികാന്തിനെയു ദുൽഖറിനെയും അടക്കം പത്ത് പേരെ ‘ചലഞ്ച്’ ചെയ്ത താരം
പ്രധാനമന്ത്രി നരേന്ദ്രമോദി തുടങ്ങിവെച്ച ‘ചലഞ്ച്’ ഏറ്റെടുത്ത് നടൻ മോഹൻലാൽ.അമിതവണ്ണത്തിനെതിരായ പ്രചരണത്തിന് തുടക്കമിട്ട് പ്രധാനമന്ത്രി നരേന്ദ്രമോദി വിവിധ മേഖലകളിൽ നിന്നുള്ള പത്തുപേരെ പ്രധാനമന്ത്രി നാമനിർദ്ദേശം ചെയ്തിരുന്നു. ഈ പോരാട്ടത്തിന് നേതൃത്വം നല്‍കുന്നതിനും തന്നെ നാമനിര്‍ദേശം ചെയ്തതിലും പ്രധാനമന്ത്രിയോട് നന്ദി പറഞ്ഞുകൊണ്ടായിരുന്നു മോഹൻലാൽ ‘ചലഞ്ച്’ ഏറ്റെടുത്തത്.ആരോഗ്യകരമായ ഒരു ഇന്ത്യ ആരംഭിക്കുന്നത് ശ്രദ്ധാപൂർവ്വമായ തെരഞ്ഞെടുപ്പുകളിലൂടെയാണ്, കൂടാതെ അധിക ഭക്ഷ്യ എണ്ണ ഉപഭോഗം കുറയ്‌ക്കുന്നത് ശരിയായ ദിശയിലുള്ള അർത്ഥവത്തായ ഒരു ചുവടുവയ്‌പ്പാണ് ഇതെന്നും സാമൂഹ്യ മാധ്യമത്തിൽ പങ്കുവെച്ച കുറിപ്പിൽ മോഹൻലാൽ പറയുന്നു.
കൂടാതെ ചലഞ്ചിൽ പങ്കാളിയാവാൻ മറ്റു പത്തുപേരെയും മോഹൻലാൽ ക്ഷണിച്ചു. സൂപ്പർ താരങ്ങളായ രജനികാന്ത്, മമ്മൂട്ടി, ചിരഞ്ജീവി, ഉണ്ണി മുകുന്ദൻ, ദുൽഖർ സൽമാൻ, ടൊവിനോ തോമസ്, മഞ്ജു വാര്യർ, കല്യാണി പ്രിയദർശൻ എന്നിവർക്ക് പുറമേ സംവിധായകരായ പ്രിയദർശൻ, മേജർ രവി എന്നിവരെയാണ് മോഹൻലാൽ ക്ഷണിച്ചത്.
അമിത വണ്ണവും ഭക്ഷ്യ എണ്ണയുടെ അമിത ഉപയോഗവും കുറയ്ക്കാൻ കഴിഞ്ഞ ദിവസത്തെെ മന്‍ കീ ബാത്തില്‍ പ്രധാനമന്ത്രി ആഹ്വാനം ചെയ്തിരുന്നു.അമിതവണ്ണപ്രശ്‌നം കൂടിവരുന്ന സാഹചര്യത്തില്‍ എണ്ണ ഉപയോഗം 10 ശതമാനം കുറയ്ക്കണമെന്ന് ആണ് മോദി പറഞ്ഞത്. മോഹന്‍ലാല്‍ അടക്കം പത്തുപേരെയാണ് മോദി പ്രചാരണത്തിനായി ക്ഷണിച്ചത്. ജമ്മു കശ്മീര്‍ മുഖ്യമന്ത്രി ഒമര്‍ അബ്ദുള്ള, ഗായിക ശ്രേയാ ഘോഷാല്‍, വ്യവസായി ആനന്ദ് മഹീന്ദ്ര, നടന്‍ മാധവന്‍, ഇന്‍ഫോസിസ് സഹസ്ഥാപകന്‍ നന്ദന്‍ നിലേക്കനി, രാജ്യസഭാംഗം സുധാ മൂര്‍ത്തി, ഒളിമ്പിമ്പിക് മെഡല്‍ ജേതാക്കളായ മനു ഭാക്കര്‍, മീരാഭായ് ചാനു, ഭോജ്പുരി ഗായകനും നടനുമായ നിരാഹുവ ഹിന്ദുസ്ഥാനി എന്നിവരാണ് മോദി ചലഞ്ചില്‍ ഉള്‍പ്പെടുത്തിയ മറ്റുള്ളവര്‍. ഇവര്‍ ഓരോരുത്തരും മറ്റ് പത്തുപേരെ ചലഞ്ച് ചെയ്യണം.ഈയിടെ, ദേശീയ ഗെയിംസിന്റെ ഉദ്ഘാടനവേളയിലും പ്രധാനമന്ത്രി ഇതേകാര്യം ചൂണ്ടിക്കാട്ടിയിരുന്നു.