സിനിമാ നടൻ ഡൽഹി ​ഗണേഷ് അന്തരിച്ചു

പ്രശസ്ത സിനിമാ നടൻ ഡൽഹി ​ഗണേഷ് (80) അന്തരിച്ചു. ശനിയാഴ്ച രാത്രി 11 മണിയോടെ ചെന്നൈയിലെ വസതിയിലായിരുന്നു അന്ത്യം. വാർദ്ധക്യസഹജമായ അസുഖങ്ങളാൽ ചികിത്സയിലായിരുന്നു. മകൻ മഹാദേവൻ ആണ് അദ്ദേഹത്തിന്റെ മരണം സോഷ്യൽ മീഡിയയിലൂടെ അറിയിച്ചിരിക്കുന്നത്.

പതിറ്റാണ്ടുകളായി തെന്നിന്ത്യൻ സിനിമയിൽ നിറസാന്നിധ്യമായ സ്വഭാവനടനാണ് ഡൽഹി ഗണേഷ്.1964-1974 കാലയളവിൽ ഇന്ത്യൻ എയർ ഫോഴ്സിൽ ഉദ്യോ​ഗസ്ഥനായിരുന്ന ഡൽഹി ​ഗണേഷ്, കെ ബാലചന്ദർ സംവിധാനം ചെയ്ത പട്ടണപ്രവേശത്തിലൂടെയാണ് സിനിമാരം​ഗത്തേക്ക് കാലെടുത്തുവെച്ചത്. തമിഴ് സിനിമകളിലൂടെ തിളങ്ങിയ ​ഗണേഷ് മലയാളത്തിലും ഹിന്ദിയിലും ‍അടക്കം വിവിധ ഭാഷകളിൽ ശ്രദ്ധേയമായ വേഷം ചെയ്തിട്ടുണ്ട്. 400-ൽ അധികം സിനിമകളിൽ അഭിനയിച്ചിട്ടുള്ള ഡൽഹി ​ഗണേഷ് തിരുനെൽവേലി സ്വദേശിയാണ്.

ധ്രുവം, ദേവാസുരം, ദ സിറ്റി, കാലാപാനി, കീർത്തി ചക്ര, പോക്കിരി രാജ, പെരുച്ചാഴി, ലാവെൻഡർ, മനോഹരം എന്നിവയാണ് ദൽഹി ​ഗണേഷിന്റെ മലയാള ചലചിത്രങ്ങൾ.

7 ചിത്രങ്ങളിൽ അദ്ദേഹം ഡബ്ബിങ് ആർട്ടിസ്റ്റായും പ്രവർത്തിച്ചിട്ടുണ്ട്.മഴലൈ പട്ടാളം എന്ന ചിത്രത്തിൽ കന്നഡ നടൻ വിഷ്ണു വർധന് ശബ്ദം നൽകിയത് ഡൽഹി ​ഗണേഷാണ്. ചിരഞ്ജീവി, പ്രതാപ് പോത്തൻ, രവീന്ദ്രൻ, നെടുമുടി വേണു എന്നിവർക്ക് തമിഴിൽ ശബ്ദമായത് ഡൽഹി ​ഗണേഷായിരുന്നു.1979-ൽ പാസി എന്ന ചിത്രത്തിലൂടെ തമിഴ് നാട് സംസ്ഥാന ചലച്ചിത്ര പുരസ്കാരവും അദ്ദേഹത്തെ തേടിയെത്തി. 1994-ൽ കലൈമാമണി പുരസ്കാരവും ഡൽഹി ​ഗണേഷ് സ്വന്തമാക്കി.

സുന്ദർ സി-യുടെ ആരാൺമനൈ 4, ശങ്കർ സംവിധാനം ചെയ്ത കമൽ ഹാസൻ ചിത്രം ഇന്ത്യൻ 2 എന്നിവയാണ് ആണ് ഡൽഹി ഗണേഷ് അഭിനയിച്ചു അവസാനം പുറത്തിറങ്ങിയ ചിത്രങ്ങൾ..