''പരാജയമില്ലാതെ വിജയം നിലനിൽക്കില്ല; ഈ വർഷം തിരികെ എത്തും'' - ജയം രവി

'കാതലിക്ക നേരമില്ല' എന്ന ചിത്രത്തിലൂടെ ജയം രവി ഈ വർഷം ബിഗ് സ്‌ക്രീനുകളിൽ എത്താൻ ഒരുങ്ങുകയാണ്. ചിത്രത്തിൽ നിത്യ മേനോൻ ആണ് നായികയായി എത്തുന്നത്. അടുത്തിടെ നടത്തിയ ഒരു പ്രസ് മീറ്റിൽ, നടൻ തൻ്റെ കരിയറിനെ കുറിച്ചും തിരിച്ചുവരവിനെ കുറിച്ചും പങ്കുവെച്ചു.

“ജയമില്ലാതെ പരാജയം നിലനിൽക്കില്ല; പരാജയമില്ലാതെ വിജയം നിലനിൽക്കില്ല. ഞാൻ ഓർക്കുന്നു, 2014-ൽ, എൻ്റെ കരിയറിൽ എനിക്ക് വളരെ മാന്ദ്യം ഉണ്ടായിരുന്നു. ആ വർഷം ഞാൻ 3 സിനിമകൾ ചെയ്തു. പക്ഷേ അവ പരാജയപ്പെട്ടു . ആ സമയത്ത്, എനിക്ക് അഭിമുഖങ്ങൾ പോലും നൽകാൻ കഴിഞ്ഞില്ല.

എല്ലാം എൻ്റെ തെറ്റാണോ എന്ന് ഞാൻ എന്നെത്തന്നെ സംശയിക്കാൻ തുടങ്ങി. എന്നിരുന്നാലും, അടുത്ത വർഷം തന്നെ, ഞാൻ എൻ്റെ കരിയറിൽ 3 ബാക്ക്-ടു-ബാക്ക് ഹിറ്റുകൾ നൽകി. നോക്കൂ, താഴെ വീണു തോൽക്കുന്നവരാണ് യഥാർത്ഥ പരാജയങ്ങൾ, അല്ലാതെ വീണ്ടും എഴുന്നേറ്റ് വീണ്ടും ശ്രമിക്കുന്നവരല്ല. അതേപോലെ ഈ വർഷം ഞാൻ തിരികെ എത്തും'' - ജയം രവി പറയുന്നു. തൻ്റെ വരാനിരിക്കുന്ന അടുത്ത ചിത്രങ്ങളുടെ ലൈനപ്പുകളിൽ രസകരമായ ചില പ്രോജക്റ്റുകൾ ഉണ്ടെന്ന് ജയം രവി പറയുന്നു. തൻ്റെ ജീവിതം കൂടുതൽ ഇപ്പോൾ സന്തോഷകരമാണെന്നും ജയം രവി കൂട്ടിച്ചേർത്തു. അടുത്തിടെ ആയിരുന്നു ജയം രവിയും പങ്കാളി അദിതിയും തമ്മിൽ വിവാഹ ബന്ധം വേർപ്പെടുത്തിയത്.

സുധ കൊങ്ങര സംവിധാനം ചെയ്യുന്ന ശിവകാർത്തികേയൻ്റെ എസ് കെ 25 ആണ് ജയം രവിയുടെ അടുത്തൊരു ചിത്രം. ബ്രദർ എന്ന ചിത്രത്തിലാണ് ജയം രവി അവസാനമായി പ്രധാന വേഷത്തിൽ അഭിനയിച്ചത്. എം രാജേഷ് ആണ് ചിത്രം സംവിധാനം ചെയ്തത്. എന്നാൽ ചിത്രം വലിയ പരാജയമാണ് ബോക്സ് ഓഫീസിൽ നേടിയത്. പ്രിയങ്ക അരുൾ മോഹനും ഭൂമിക ചൗളയും പ്രധാന വേഷങ്ങളിൽ അഭിനയിച്ച ചിത്രം 2024-ൽ ഒരു ബോക്സോഫീസ് ബോംബായിരുന്നു.

കിരുത്തിഗ ഉദയനിധി രചനയും സംവിധാനവും നിർവ്വഹിക്കുന്ന റൊമാൻ്റിക് കോമഡി ചിത്രമാണ് 'കാതലിക്ക നേരമില്ലൈ '. റെഡ് ജയൻ്റ് മൂവീസിൻ്റെ ബാനറിൽ ഉദയനിധി സ്റ്റാലിനാണ് ചിത്രം നിർമ്മിക്കുന്നത്. യോഗി ബാബു, വിനയ് റായ്, ജോൺ കൊക്കൻ, ലാൽ എന്നിവരാണ് ചിത്രത്തിലെ മറ്റു പ്രധാന കഥാപാത്രങ്ങൾ.